బితిక బడికి వెళుతోంది..

కోల్‌కత నగరంలోని ఒక సర్కారీ బడిలో 6వ తరగతి చదువుతోంది పేదింటి బాలిక బితికా నయాబన్. తను బాగా చదువుకుని తమ కుటుంబాన్ని మంచి స్థితిలో ఉంచాలనేది ఆమె తపన. ఈమె అమ్మా.. నాన్న మాత్రం ఈ చిన్నారికి పెళ్ళిచేసి చేతులు దులుపుకోవాలని నిర్ణయించుకున్నారు. ఒక రోజున ఆయిల్ మిల్లులో పనిచేసే ఒకతనితో నీ పెళ్ళంటూ ఆమె చేత బడికి ఎగనామం పెట్టించారు. డిసెంబర్ 14, 2011న పెళ్ళి జరగాల్సి ఉంది. డిసెంబర్ 13న బితిక తన స్నేహితురాలిని పిలిపించింది. తనకు పెళ్ళి చేస్తున్నారని, తన యూనిఫారం, పుస్తకాల్ని ఎవరైనా పేదమ్మాయికి ఇమ్మని చెప్పి పంపించింది. తాను ఎంతో ప్రేమించే చదువు మానుకోవాల్సిన పరిస్థితిలో కూడా మరో పేదమ్మాయికి తన యూనిఫారం, పుస్తకాలు ఇవ్వాలని కోరడం ద్వారా బితిక తన ఔదార్యాన్ని చాటుకుంది.

ఈ స్నేహితురాలు బితిక గురించి తన బడి ప్రధానోపాధ్యాయుడికి చెప్పింది. అప్పటికే బితిక ఎందుకు బడికి రావడంలేదంటూ ఆరా మొదలైంది. ఈ బడి ఒక స్వచ్ఛంద సంస్థ ఆధ్వర్యంలో నడుస్తోంది. సంస్థవారు కూడా బితిక స్నేహితురాలు, ప్రధానోపాధ్యాయుని నుంచి వివరాలు అందుకుని పోలీసులకు ఫిర్యాదు చేశారు. తర్వాత ఈ బడిలోని ఉపాధ్యాయులంతా బితిక ఇంటికి పరుగులు తీశారు. అంతా కలిసి ఆమె తల్లిదండ్రుల్ని ఒప్పించారు. అమ్మాయి చదువుకు తాము తోడై నిలుస్తామని హామీ ఇచ్చారు. ఇంకేముంది బితిక బడిబాట పట్టింది.